Афсонавий қиличбоз Собиржон Рузиев вафот этди

Афсонавий қиличбоз Собиржон Рузиев вафот этди
Ўзбекистон қиличбозлик федерацияси чуқур қайғу билан шуни маълум қиладики, 2026 йил 22 август куни ҳаётининг 74-йилида ўзбек спортининг атоқли намояндаси, Олимпия ўйинларининг кумуш медаль соҳиби, уч карра жаҳон чемпиони Собиржон Сабитович Рузиев вафот этди.
Собиржон Рузиев 1953 йил 15 июнь куни таваллуд топган. СССР терма жамоаси таркибида рапира бўйича иштирок этиб, йирик халқаро мусобақаларда юксак натижаларга эришган. 1980 йилда Москва шаҳрида ўтказилган Олимпия ўйинларида жамоавий баҳсларда кумуш медални қўлга киритган ва шахсий мусобақада тўртинчи ўринни эгаллаган.
Собиржон Сабитович уч карра жаҳон чемпиони бўлган, жаҳон чемпионатларида кумуш ва бронза медалларни қўлга киритган, шунингдек, умумиттифоқ ва халқаро мусобақаларда кўп бор ғолибликка эришган.
Спортчилик фаолиятини якунлаганидан сўнг у бутун умрини Ўзбекистонда жисмоний тарбия, Олимпия ҳаракати ва қиличбозлик спортини ривожлантиришга бағишлади. Турли йилларда Собиржон Рузиев Ўзбекистон Республикаси Жисмоний тарбия ва спорт давлат қўмитаси, Ўзбекистон Миллий Олимпия қўмитаси ҳамда Ўзбекистон қиличбозлик федерациясига раҳбарлик қилган, шунингдек, Осиё қиличбозлик конфедерациясининг раҳбар органларида мамлакатимиз номидан фаолият юритган.
Унинг буюк хизматлари «Ўзбекистон Республикасида хизмат кўрсатган спортчи» фахрий унвони, Ўзбекистон Республикасининг Фахрий ёрлиғи, Халқаро Олимпия қўмитасининг Кумуш Олимпия ордени ва бошқа юксак мукофотлар билан тақдирланган.
Собиржон Сабитович миллий қиличбозлик мактабининг асосчиларидан бири бўлиб, мардлик, спортга садоқат ва Ватанга фидокорона хизмат қилишнинг ёрқин намунаси сифатида хотирамизда абадий қолади. Унинг номи ўзбек ва жаҳон қиличбозлиги тарихига олтин ҳарфлар билан битилган.
Ўзбекистон қиличбозлик федерацияси Собиржон Сабитовичнинг оила аъзолари, яқинлари, дўстлари, ҳамкасблари ва шогирдларига чуқур ҳамдардлик билдиради.
Унинг порлоқ хотираси қалбларимизда абадий сақланиб қолади.