Хоразмлик ёш қиличбозлар учун маҳорат дарслари ташкил этилди
Хоразмлик ёш қиличбозлар учун маҳорат дарслари ташкил этилди
Ўзбекистон қиличбозлик федерацияси томонидан бугунги кунда республикамизнинг турли минтақаларида қиличбозлик спортини жадал ривожлантириш борасида аниқ мақсадга йўналтирилган қатор самарали ишлар амалга оширилмоқда.
Мана шундай лойҳалардан бири, бу Миллий терма жамоа тренерлари иштирокида вилоятлардаги ёш қиличбозлар спорт маҳоратини янада ошириш, жойларда қиличбозлик спорти билан шуғулланаётган болалар орасида иқтидорли спортчиларни аниқлаш, маҳаллий тренерларнинг малакасини ошириш мақсадига йўналтирилган.
Шу кунларда қиличбозликнинг рапира йўналиши бўйича Миллий терма жамоанинг тренерлари Аброр Собиров ва Жонибек Халмуратов Хоразм вилояти Хива шаҳридаги ёш қиличбозларга ўқув семинар машғулоти ҳамда маҳорат дарсларини ўтказишмоқда.
- Биз Хива шаҳри болалар меҳрибонлик уйида очилган қиличбозлик тугараги аъзолари учун ўқув семинари ўтказдик, - дейди Жонибек Халмуратов, Миллий терма жамоанинг рапира йўналиши тренери. - Шунингдек, Хива тумани 33 ўрта маҳсус таълим мактабида ҳам қиличбозлик тугарагида очиқ маҳорат дарси ўтказилди. Айтиш керакки, бу ерда қиличбозликспорти билан шуғулланаётган болаларнинг машғулотларга қизиқишлари жуда ҳам катта экан. Айниқса, семинар давомида жажжи қиличбозлар ўзларини қизиқтирган саволлари билан фаол иштирок этишди ва амалий машғулотларда олган билимларини синовдан ўтказишда катта иштиёқ билан қатнашишди.
Албатта, бу каби амалий саъй-ҳаракатлар келгусида қиличбозлик спортида "янги юлдузларни" кашф этишда ўз самарасини беради.
Эслатиб ўтамиз Хоразм вилояти Хива шаҳри ва туманидаги қиличбозлик спортига оид семинаржорий йилнинг 17 май санасидан 24 май кунигача давом этади.
ЎзҚФ Матбуот хизмати