Стадион ва концерт заллари одамларга тўла. Нега ўзбекистонликлар эпидемия хавфини унутишди?

2020 йил 15 март куни Ўзбекистон тарихида алоҳида сана сифатида муҳрланган. Айнан шу куни коронавирусга чалинган илк бемор расман қайд этилган ва республика тарихида илк марта карантин жорий этилганди. Аммо роппа-роса бир йил ўтиб, 2021 йилнинг 15 марти ҳам кўпчиликни саросимага солди – касаллик яна кенг тарқала бошлади.

Нафсиламрини айтганда, ўзи умумий чекловлар бекор қилингани ҳам йўқ эди. Ниқоб тақиш, масофа сақлаш, жамоат жойларга киришда антисептик воситалардан фойдаланиш, ҳароратни ўлчаш ҳеч қачон бекор қилинмаган. Лекин бу қоидаларга анчадан бери риоя қилинмаяпти, дейилади kun.uz махсус видео-репортажида.

Тегишли қоидалар асосида эркинликлар берилди: жамоат транспорти ҳаракати тикланди, таълим масканлари ва умумий овқатланиш шохобчалари очилди, буюм бозорлари ишга тушди, оммавий тадбирларга рухсат берилди.

Аммо бу эркинликлар учун жорий этилган талаблар шунчаки қоғозда қолди. Умуман, 2020 йил охирига келиб Ўзбекистон аҳолиси карантин ҳали бекор қилинмаганини деярли буткул унутиб юборганди. Аввал 30, кейин 100 кишига қадар рухсат берилган тўйлар пандемиядан аввалги кўринишга қайтди. Ваҳоланки, тўйхона ва кафе-ресторанларда назорат ўрнатилиши ҳамда ташриф буюрувчиларда ПЗР тест натижаси бўлиши лозим эди.

Оммавий тадбирлар эса қизғин тус олмоқда. Мухлисларга тўлган стадионларда, «Миллион» жамоасининг, Юлдуз Усмонованинг концертларида ҳам заллар лиқ тўлди, масофа буткул, ниқоб эса деярли унутилди.

Ҳолбуки, Республика махсус комиссиясининг қарорига кўра, концерт ва томоша тадбирларини ўтказишга рухсат берилганда қуйидаги талаблар белгиланган эди:

• концертларда томошабинлар сонини 50 фоиздан оширмаслик;

• томошабин ўриндиқларидан оралиқ масофани сақланишини таъминлаш (орада битта ўриндиқ қолдириш);

• концертга келган томошабин ҳамда хизмат кўрсатувчилар ниқобда бўлиши.

Бу қадар эркинликка ким йўл қўяётганини сўраб «Ўзбекнаво» эстрада бирлашмасига мурожаат қилганимизда, бу ташкилот вакили фақат санъаткорларга лицензия бериши, оммавий тадбирлардаги тартибга жавобгар эмаслигини билдирди.

Махсус комиссия вакили Нурмат Отабеков Ўзбекистонда ниқоб тақиш, ижтимоий масофа, антисептик воситалардан фойдаланишга амал қилинмаётганини, бу соғлик учун кераклигини айтди.

Бугунги кунга келиб жаҳонда коронавирусга чалинганлар сони 120 миллиондан ошган, Ўзбекистонда 2020 йил мартидан буён ҳар куни янги касалланиш ҳолатлари аниқланиб келмоқда. Биринчи тўлқинда ҳосил қилинган иммунитет муддати аллақачон тугаган, сўнгги ҳафталарда Тошкент шаҳрида кунлик кўрсаткичлар йил бошидан буён рекорд даражага чиқа бошлагани ҳам шундан далолат беради.

Эндиликда ҳукумат карантин қоидаларига амал қилиниши устидан назоратни кучайтира бошлади, кўчаларда ниқобсиз юрганлар ва ижтимоий масофани сақламаётганларга яна жарима қўлланмоқда.

Конспирологик назариялар ишқибозлари «вакцинани сотиш учун қилинган ўйин» дея баҳолаётган бугунги вазият аслида жиддий эътиборни талаб қилади. Унутманг, ҳеч ким бизни вирусдан ўзимизчалик ҳимоялай олмайди!