Маълумки, сўнгги кунларда Тошкент шаҳрида карантин қоидалари яна кучайтирилди. Бундан кўзланган мақсад, аввало аҳоли ва ёшларимиз саломатлигини асраб-авайлаш, эпидемиологик вазиятнинг яна авж олиб кетишининг олдини олишдан иборат.

Йиғилишда мавжуд вазиятни ҳисобга олган ҳолда вазирлик тизимидаги барча ташкилотларда эҳтиёткорлик чораларига жиддий эътибор қаратиш кераклиги айтиб ўтилди. Шуни алоҳида таъкидлаш керак, юртимизда карантин талаблари ҳали бекор бўлганича йўқ. Аммо, касаллик аломатларининг сезиларли даражада камайиши натижасида юртдошларимизда карантин қоидаларига эътибор бироз пасайди. Оқибатда яна касаллик аломатлари хуруж қила бошлади.

2021 йил мамлакатимиз спортчилари учун масъулиятли йиллардан бири. Бу йил атлетларимиз Токио олимпиадасида иштирок этишади. Ушбу нуфузли мусобақага пухта ҳозирлик кўриш мақсадида спорт турлари бўйича терма жамоаларимиз мунтазам равишда ўқув-машғулот йиғинлари ва мусобақаларда иштирок этиб туриши лозим. Чунончи, март-апрель ойларида турли спорт турлари бўйича 30дан ортиқ ўқув-машғулот йиғинлари ҳамда ички ва халқаро спорт мусобақалари ташкил этилиши режалаштирилган.

“Ушбу режаларнинг тўлиқ амалга ошиши кўп жиҳатдан ўзимизга ҳам боғлиқ. Агар карантин қоидаларига қаттиқ амал қилган ҳолда эҳтиёт чораларини кўрсак, яъни спорт иншоотларини мунтазам равишда дизенфекция қилиб туриш, спортчилар машғулотларга келганида уларнинг ҳароратини ўлчаш, қўлларини антисептик воситалар билан ювиб туриш, ижтимоий масофага амал қилсак, спортчилар муаммосиз одатдаги режимда машғулотларини давом эттиришади. Шунинг учун тизимдаги барча ташкилотлар ҳамда спорт таълим муассасаларида карантин қоидаларига сўзсиз амал қилиниши лозим”, - деди Равшан Эрматов йиғилишда.

Таъкидлаш лозим, ҳозирча спорт мусобақалари бекор қилингани йўқ, уларга томошабинлар киритилишида ҳам ҳеч қандай тўсиқ йўқ. Фақат, карантин қоидаларига қатъий амал қилиш талаб этилади. Шундай экан, барча спортчи ва тренерлар ҳамда томошабинлардан карантин қоидаларига сўзсиз амал қилишларини сўраймиз.