Суҳбат. Ахмадиллохон Солихожиев: "Ҳозирда энг катта орзуим бу келаётган Олимпидага йўлланма олиб, албатта чемпион бўлиш..."

Ахмадиллохон Солихожиев: "Ҳозирда энг катта орзуим бу келаётган Олимпидага йўлланма олиб, албатта чемпион бўлиш..."

Бугунги бизнинг суҳбатдошимиз истиқболли рапирачи Ахмадиллохон Солихожиев, қиличбозлик бўйича Миллий терма жамоа аъзоси, Ўзбекистон спорт устаси, Республика ҳамда халқаро турнирлар ғолиб ва совриндори. Солихожиев Ахмадиллохон Акмалхон ўгли 2001 йилнинг 11 августида Андижон вилояти Асака шахрида тугилган.

Суҳбатимиз аввалида Солихожиевни оила аъзолари ҳақида сўзлаб беришни бежиз сўрамадик. Бунинг боиси, Ахмадиллохоннинг укаси Анвархон ҳам ҳозирда Миллий терма жамоаси аъзоси. Ака-ука Солихожиевлар ҳавас қилса арзигулик иқтидорли қиличбозларимиздан.

- Оила аъзоларингиз ҳақида тўхталиб ўтсангиз.

- Оиламизда аввало, отам Акмалхон Курбонов ва онам Хилолахон Мирзакаримова, шунингдек синглим Дилнура жуда ҳам спортга қизиқишади. Мен ва укам Анвархон қиличбозлик спорти билан шуғулланишимиз учун ота-онам имқон қадар шароит яратиб бериш билан бир қаторда доимо бизни руҳлантириб, мақад сари олға боришимизда далда бўлишади.

- Қиличбозлик сирларини ўргатаётган устоз-тренерингиз ким?

- Менинг биринчи ва ҳозирги устоз-тренерим Мурдасов Вахоб Абдураимжонович. Мен уларни жуда ҳам қаттиқ қўл ва ўз ишига масъулиятли тренер деб ўйлайман. Шу боис ҳам эришаётган ютуқларимда тренеримни ҳиссаси катта.

- Қиличбозлик ҳаётингизда қанчалик муҳим ўрин эгаллайди?

- Қиличбозлик хаётим мазмунига айланди десам ҳам бўлаверади.

- Агар қиличбоз бўлмаганингизда қайси спорт турини танлаган булардингиз?

- Кураш спорт турини танлаган бўлардим чунки қиличбозликка келишдан олдин кураш билан шуғуланганман.

- Дунёга машҳур қиличбоз спортчилардан қай бири сизда ҳайрат уйғотади?

- Дунёдаги кўплаб машҳур қиличбозларни биламан ва уларнинг ҳар бири ўз услубига эга.

Менда ҳайрат уйғотадиган спорчилар бу Россиялик ака-ука Бородочевлар.

- Сизнингча мақсадга эришишнинг сири нимада?

- Қўйилган мақсадга ишонган холда узлуксиз меҳнат ва ҳаракат қилиш деб ўйлайман.

- Сиз билан бирга укангиз ҳам  қиличбозлик билан шуғулланади, айтингчи укангиздаги қайси яхши фазилат сизда бўлишини хоҳлардингиз?

- Укамдаги хушчақчақлик фазилати менда ҳам бўлишини истардим.

- Тренерлар билан ишлашда бирон бир тушунмовчилик юзага келганда сиз қандай йўл тутасиз?

- Агар тренерим билан орамизда тушунмовчилик юзага келса  албатта уни бартараф этиш йўлларини кидирган бўлардим.

- Жамоада ким сиз учун энг кучли рақиб?

- Жамоадаги энг кучли рақиб - бу укам Солихожиев Анвархон.

Энди эса, "блиц" саволлар:

- Ёқтирган машғулотингиз?

- Футбол ўйнаш.

- Севимли китобингиз?

- Ёқтирган китобим бу "Разум Чемпионов".

- Ҳаётдаги шиорингиз?

- "Ўзбекистон олға!"

- Ёқтирган таомингиз?

- "Девзира" гуручидан тайёрланган палов.

- Дўстлик сизнингча нима?

-  Дўстлик бу қадрланиши ва йўқотилмаслиги керак бўлган совғадир.

- Энг катта орзуингиз?

- Ҳозирда энг катта орзуим бу келаётган Олимпидага йўлланма олиб, албатта чемпион бўлиш ва жаҳон спорт ареналарида Ватанимиз шарафини янада юксалтириш.

- Кимларга рахмат демоқчисиз?

- Ота-Онам, тренерларим, Қиличбозлик федерациясига, Миллий Олимпия Қўмитаси, ва албатта биз каби ёшлар, айниқса спортчилар учун ғамхўрлик қилиб, кенг имкониятлар яратиб бераётган, муҳтарам Президентимиз Мирзиёев Шавкат Миромоновичга катта рахматимни айтиб қоламан.

Муборак Якубова суҳбатлашди.