Ирина Винер тўлиқ 20 йил давомида, яъни 1971 йилдан 1992 йилгача бадиий гимнастика бўйича Ўзбекистон миллий терма жамоасини бошқарганидан жуда мамнунман. Ушбу даврда у СССР терма жамоаси сафида беш карра чемпион Венера Зарипова, Интервидение кубоги ғолиби Вера Шаталина, жаҳон чемпиони Марина Николаева ва СССР чемпиони Элена Холодовани тарбиялади.
Бугунги кунга келиб, Ирина Александровна кўплаб Олимпия ўйинлари, Европа ва Жаҳон чемпионларига, шунингдек Россия чемпионларига мураббийлик қилган. Ушбу хизматлари учун Ирина Александровна бир қатор мукофотларга эга. Жумладан, Россия Федерацияси Президенти Владимир Путин томонидан тақдим этилган «Россия Федерацияси Меҳнат Қаҳрамони» унвонини алоҳида таъкидламоқчиман. Ирина Александровна шахсан Озарбайжон Президенти Илҳом Алиевнинг қўлидан «Дўстлик ордени»ни қабул қилиб олган.
Афсонавий мураббий шогирдларининг фикрича, Ирина Александровнанинг бўлажак гимнастикачиларни тарбиялашга алоҳида ёндашиши катта қизиқиш уйғотади. Виенер спортчиларни тайёрлаш учун махсус тизим ишлаб чиқди. Мураббий спорт залида ишлашдан ташқари, ўқувчилар соғлиғидан тортиб шахсий ҳаётигача бўлган барча соҳаларини бошқаришга ҳаракат қилади. Ирина Александровна ҳар доим шогирдлари учун онаси бўлиб келган ва уларни биринчи ўринга кўтарган. Унинг шогирдлари билан машғулотларни таҳлил қилиб, уни эртаклардаги қор маликаси билан таққослашингиз мумкин. Чунки унда доим жаҳл бўлган, лекин ҳамиша унинг кўзларидан шогирдларини қандай севишини ва ҳатто ўқувчиларининг касаллиги пайтида ҳам уларни тарк этмаслигини, меҳрибонликни ҳам кўришингиз мумкин.
Унинг энг севимли ўқувчиларидан бири Алина Кабаева эди. У жуда ёрқин ва кучли спортчи бўлган. Улар ҳатто ҳозиргача дўстона алоқаларни сақлаб қолишган. Алина дисквалификация қилинганида ҳам, Ирина Александровна бошқа шогирд танламади, балки фурсатни кутиб, Алина ва унинг натижалари учун курашди.
Таъкидлаш жоизки, афсонавий мураббий Ирина Александровна нафақат мураббийлик иши билан шуғулланади, балки 2003 йили таълим соҳасида “Бадиий гимнастикада малакали спортчиларни тайёрлаш” мавзусини танлаб, диссертациясини ёқлайди ва ҳимоя қилади. 10 йил ичида илмий фаолиятини давом эттириб, P.F.Lesgaft номидаги Санкт-Петербург жисмоний тарбия, спорт ва соғлиқни сақлаш университетида докторлик диссертациясини ҳимоя қилди ва педагогика фанлари доктори бўлди.
Ирина Александровнанинг азалий орзуси профессионал гимнастикачиларни тайёрлаш учун алоҳида ҳудудий мажмуани яратиш эди. 2013 йилда у ушбу ғояни амалга оширди ва «Новогорск Олимпия шаҳарчаси» ўқув-машғулот базасини қурди. Ушбу мажмуа асосида Ирина Винернинг Халқаро спорт академияси очилди. У жисмоний тарбия ва ўрта мактаб билан ҳамкорликда ҳар томонлама маълумот берадиган спорт ва таълим муассасасидир.
Амалиёт кўрсатганидек, ушбу лойиҳа юқори даражадаги профессионал спортчиларни тайёрлашни ва спортчилар захирасини яхшилашга имкон берди.
Хулоса қилиб шуни айтишим мумкинки, ҳамюртимиз Ирина Александровна чиндан ҳам ажойиб мураббий, истеъдодли мутахассис ва ўз ишини севадиган, уни ажойиб тарзда бажарадиган инсон. Ирина Винер-Усманова мен учун аёл гўзаллиги, донолиги рамзидир.
Азизахон Холдарова, ТДИУ 2-босқич талабаси