Соғлом турмуш тарзига, айниқса шахсий гигиена қоидаларига риоя этиш кўплаб муаммоларнинг олдини олиш демакдир. Бир қараганда қийин кўринувчи, анчагина ирода, сабр талаб этувчи соғлом турмуш тарзининг асосий қоидалари нималардан иборат?
Авваломбор, ҳар бир одам шахсий гигиена қоидаларига риоя қилиш шарт. Шахсий гигиена ҳар бир кишининг ўзига ва ёшига боғлиқ бўлиб, ақлий ва жисмоний меҳнатни тўғри йўлга қўйиш, жисмоний тарбия билан шуғулланиш, вақтида овқатланиш, ухлаш, дам олишни тўғри ташкил этишдан иборат.
Биринчи навбатда, баданни озода сақлашга эътибор бериш зарур. Айниқса, баданнинг очиқ жойлари, шунингдек, тирноқ ости тез кирланади, шунинг учун қўлни бот-бот совунлаб ювиб туриш, тирноқларни тўғри парвариш қилишга одатланиш керак. Уйда овқат тайёрлаганда ҳам, кўча-кўйда юрганда ҳам қўлнинг тозалигига эътибор бериш, тез-тез совунлаб ювиш лозим.
Шахсий гигиена қоидаларига болалар жуда ёшлигиданоқ одатланиши зарур. Ўринга ётишдан олдин қўл-оёқни ювиш керак. Оғиз бўшлиғини тоза тутиш фақат тишнинг соғлом бўлишини таъминлабгина қолмай, балки ички аъзолардаги касалликларнинг олдини олишда ҳам муҳим. Ички кийим тоза бўлиши, пайпоқни тез-тез алмаштириб туриш шахсий гигиенада жуда муҳим.
Овқатланишдан аввал ва кейин албатта қўлларни ювиш, уйқудан олдин ва овқатлангандан кейин тишларни тозалаш, тоза кийим, умуман, тозаликка қатъий риоя этиш соғлом турмуш тарзининг асосий шартларидан ҳисобланади.
Шу ўринда қайд этиш лозимки, “Оила” маркази “Ўзбекистон миллий энциклопедияси” билан биргаликда “Оила энциклопедияси”ни 10 минг нусхада нашрдан чиқарган. Мазкур “Оила энциклопедияси”да “А”- дан то “Ҳ” ҳарфигача бўлган оила масалалари ва жумладан, оила гигиенасига оид тушунчалар изоҳи ва ана шу тушунчалар борасидаги илмий маълумотлар берилган бўлиб, оиладаги шахслараро муносабатларнинг турлари, оилада соғлом психологик муҳитни шакллантиришда ота-оналарнинг оила бўйича ҳуқуқий, маънавий, тиббий, иқтисодий, психологик билимларини фарзанд тарбиясида қўллай олиш чоралари, соғлом ва бахтли оилани яратиш борасидаги қоидалар ва бошқа кўплаб тавсиялар берилган.
Унутманг! Соғлом турмуш тарзи, бу – ҳар қандай касалликлар профилактикаси ва саломатлик гаровидир. Соғлом турмуш тарзи қоидаларига риоя этган одам оиласи, меҳнат жамоаси, умуман, жамиятда ўз ўрнига эга бўлади, турли мураккаб вазиятларни енгиб ўтиш, ҳаёт қийинчиликлари олдида ўзини йўқотмасликка ўрганади.
Карантин шароитида шахсий гигиенага қатъий риоя қилинг!
Г.Аширова.
“Оила” маркази мутахассиси.