Sport faoliyati taʼlim yoʻnalishida oʻqish muddatining bir yilga qisqartirilishi Oʻzbekiston Respublikasi Prezidentining 2020-yil 24-yanvardagi “Oʻzbekiston Respublikasida jismoniy tarbiya va sportni yana-da takomillashtirish va ommalashtirish chora-tadbirlari toʻgʻrisida”gi PF–5924-sonli farmonida belgilab berilgan, 2025-yilgacha davlat sport taʼlimi muassasalarida trener va mutaxassislarning sifat tarkibi, xususan oliy maʼlumotli xodimlar sonini bosqichma-bosqich 80 foizgacha yetkazish borasidagi vazifani bajarishda qoʻl keladi.

Darvoqe, “2020/2021 oʻquv yilida Oʻzbekiston Respublikasining oliy taʼlim muassasalariga oʻqishga qabul qilishning davlat buyurtmasi parametrlari toʻgʻrisida”gi Prezident qaroriga muvofiq 2020/2021 oʻquv yili uchun Oʻzbekiston davlat jismoniy tarbiya va sport universitetining bakalavriat taʼlim yoʻnalishiga 1 300 nafar talaba oʻqishga qabul qilinishi belgilangan. Bu oʻtgan yilga nisbatan 10 foizga koʻp demakdir.

Eslatib oʻtamiz, pandemiya sababli 2020/2021 oʻquv yili uchun kirish imtihonlari optimallashtirildi. Unga koʻra, Oʻzbekiston davlat jismoniy tarbiya va sport universiteti abituriyentlari joriy yilda kasbiy (ijodiy) imtihonlarda ikkita yoʻnalishda imtihon topshiradi. Shuningdek, kasbiy (ijodiy)+test shaklidagi taʼlim yoʻnalishlarida esa abituriyentlar avvalgidek ikkita emas, balki bitta yoʻnalishda ijodiy imtihondan oʻtishadi.

Prezident qarori bilan, 2020/2021 oʻquv yili uchun qabul jarayoni 2020-yil 20-iyundan 20-iyulgacha davom etishi belgilangan.

Jismoniy tarbiya va sport vazirligi
Matbuot xizmati