Интервью

Ёркин Йулдашев: "Интизом ва ишонч спортчини зафарга элтувчи омиллардир"

Суҳбатдошимиз қиличбозлик бўйича Ўзбекистон Миллий терма жамоаси сабля йўналиши мураббийи Йулдашев Ёркин Араббаевич.

- Қиличбозлик билан қачондан шуғуллана бошлагансиз? Мураббийлик фаолиятингизга ҳам тўхталиб ўтсангиз.

- Мен қиличбозлик спорти билан 1986 йилда Республика спорт мактаб интернатида (РУОР Тошкент ш.) шуғуллана бошлаганман. Спортчи сифатида фаолиятимни якунлаб, бир муддат бошқа соҳада иш олиб бордим.

 2019 й. март ойидан қиличбозликнинг сабля йўналиши бўйича Миллий терма жамоада мураббийлик фаолиятимни бошлаганман. Ҳозирги кунда терма жамоамизда мен билан бирга дунёга машҳур мураббийлардан бири Владимир Назлимов, ўз касбининг усталари бўлган мураббийлардан россиялик Александр Житецкий ва болгариялик Мартин Камаджиевлар иш фаолиятини олиб боришмокда.

Ўзбекистон қиличбозлик Федерацияси раҳбарияти ва мураббийлар томонидан Миллий терма жамоа аъзолари бўлган спортчиларнинг натижаларини юқори ўринларга кўтариш учун аниқ мақсадга йўналтирилган ишлар олиб борилмоқда.

- Ўз мураббийларингиз ҳақида гапириб берсангиз.

- Талабалик йилларимда қиличбозлик сирларини биринчи мураббийим, сабля йўналишида энг маҳоратли спорт устаси Лим Владимир Дмитриевичдан ўрганганман. Владимир Лим, ўта талабчан ва шу билан бирга биз шогирдларига жуда ҳам меҳрибон мураббий эди.

Шунингдек, қиличбозлик бўйича яхши спортчи ва келажакда шу соҳанинг эгаси бўлишимда мураббийларим Пўлат Абдураззаков, Карим Абдураззаков, Валерий Малахов, Анатолий Бабрушка ва Константин Коноваловларнинг катта меҳнатлари синган. Шу боис ҳам, спорт фаолиятимда кўплаб собиқ СССР ва халқаро мусобақаларда қатнашиб совриндорлар қаторидан жой олганман.

- Сиз учун мураббийлик деганда қайси жиҳатларни санаб ўтган бўлардингиз?

- Биласизми, айрим инсонлар мурббийлик фаолиятини осон деб тасаввур қилишади, аслида эса бу ўта масъулиятли ва матонатли касблардан бири. Бунинг учун аввало:

• Интизом. Ҳар бир ишни ўз вақтида ва жойида бажариш.
• Жамоада ўзаро ҳурмат ва аҳиллик.
• Мураббийлар ва спортчилар ўртасида бир-бирига бўлган ишонч талаб этилади.

Мен мураббийликни Она ватанга содиқликда деб биламан. Албатта, мадҳиямизни жаҳон ареналарида жаранглаши ва “Ўзбек” деган номни дунёга танитишда мураббийнинг роли катта деб уйлайман.

- Ҳозирги мураккаб карантин даврида спортчилар билан қандай ишларни амалга оширмоқдасиз?

- Ҳозирги карантин даврида онлайн ва мобил алока воситалари орқали спортчиларимизга кунлик  режа асосида топшириқлар бериб назорат қилиб турибмиз. Лекин, шунга қарамай биз мураббийлар хоҳлагандек етарли даражада спортчиларимиз машғулотларни бажараолишмаяпти, сабаби улар ҳали ёш ва уй шароитида мустақил машғулотларни ташкил этиш учун тажриба йўқ. Ишонамизки бу камчиликлар вақтинчалик.

Албатта, яқин кунларда биз ҳаммамиз биргаликда пандемияни енгиб, аввалги вазиятни тиклаймиз ва яна спортзалларида машғулотлар, мусобақаларни бошлаймиз. Ишонаманки, биз ўзбек қиличбозлари Ватанимиз байроғини халқаро мусобақаларда баланд чуққиларга кўтарамиз.

Энди эса "блиц" саволаримизга сизнинг жавобингиз.

- Сиз ёқтирган машхур спортчи?

- Леонель Месси.

- Иштиёқ билан ўқиган асарингиз?

- Тохир Маликнинг "Шайтанат" асари.

- Сизнинг хобби - қизиқадиган машғулотингиз.

- Футбол ўйнаш.

- Севимли қаҳрамонингиз.

- Севимли қахрамоним буюк аждодимиз Амир Темур.

- Агар қиличбоз бўлмаганингизда қайси спорт турини танлаган бўлардингиз?

- Агар мен қиличбоз бўлмаганимда футболни танлаган бўлардим.

Қизиқарли ва мазмунли суҳбатингиз учун раҳмат. Келгусида сизга мустаҳкам соғлиқ ва ишларингизда омад, ёрқин спорт ғалабаларини тилаймиз.

 

Муборак Якубова суҳбатлашди.