Миннатдорчилик

 Азиз юртдошлар, коронавирус пандемияси халқимизни янада бирлашишга ва барча кучларни кўринмас касалликка қарши курашиш учун сафарбар этишга  тақозо этди. Президентимиз, Шавкат Мирзиёев ва Ўзбекистон ҳукумати аҳоли, иқтисодиёт, қишлоқ хўжалиги экинларини сақлаш ва ҳимоя қилиш борасида барча имкониятларни ишга солмоқда.

Бухоро ва Хоразм вилоятларида рўй берган кутилмаган табиий офат, сўнгра Сардобадаги сув омбори тўғонининг бузилиши республикамизга улкан моддий зарар етказди.

Бу синовли, қийн кунларда мамлакатимиз ҳамда жабрланганларга жисмоний, молиявий ва муайян даражада кўмак бериш имкониятига эга бўлган ҳар бир киши чин юракдан ўз ёрдамини бермоқда. Мана шундай саҳоватли ўзбек халқининг ҳақиқий ва содиқ ўғлонларидан бири Алишер Бурханович Усмановдир.

Алишер Усмановнинг жаҳон санъати ва мусиқа дурдоналарини, аждодларимизнинг маданий-маънавий меросини асраб-авайлаш, дунё миқёсида илм-фан ва спорт тараққиёти учун қанча ишлар қилганини узоқ вақт санаб ўтиш мумкин. Унинг ўз Ватани ва халқига кулфат етганида ёрдам бераётгани алоҳида эътирофга лойиқ.

Азалдан қиличбоз-мушкетёрлар ҳамиша олийжаноблик, довюраклик ва дадил ҳаракатлар билан ажралиб турганлар. Биз, Ўзбекистон қиличбозлик фахрийлари ҳамда мамлакатимизнинг бутун қиличбозлик оиласи ўз ватандошимиз бўлган Халқаро қиличбозлик Федерацияси президенти билан чин дилдан фахрланиб, унга сиҳат-саломатлик, узоқ умр, Аллоҳ тақдир этган йўлда улкан муваффақиятлар тилаймиз.

Баходир Назиров, Ўзбекистон

қиличбозлик фахрийлари кенгаши раиси