Спорт аввало масъулият, меҳнат ва интизом талаб этади

Суҳбат

Спорт аввало масъулият, меҳнат ва интизом талаб этади

Шу кунларда Тошкент вилояти Бўстонлиқ туманининг тоғли ҳудудидаги "Ширинбулоқ" спортбазасида ёш қиличбозлар учун ташкил этилган анъанавий ўқув-йиғин машғулотларида Андижонлик иқтидорли қиличбоз қиз — Маржона Усманова билан суҳбатлашдик.
У айни дамда қиличбозлик бўйича олдинда бўладиган нуфузли турнирларга пухта тайёргарлик кўрилаётгани ҳақида сўзлаб берди.

Ўн беш ёшли Маржона Усманова қиличбозликнинг рапира йўналишидаги кадетлар терма жамоаси аъзоси, республика Чемпионатлари ва Кубоклари ғолиб ва совриндори Ўрта Осиё чемпиони (2018 й.).

– Маржона айтингчи ҳозирда сиз қатнашаётган аъанавий йиғин сиз учун нима билан аҳамиятли?

– Бугун узоқ танаффусдан сўнг биз орзиқиб кутган одатий, жамоавий ўқув йиғин машғулотларини бошладик. Бундан жудаям хурсандман. Айниқса илк маротаба тоғли ҳудудда, тоза ҳаво ва ажойиб табиат бағрида ўтказилаётган машғулотлар бизга яна ҳам руҳий тетиклик ва куч-қувват бағишламоқда. Мураббийларимиз машғулотлар жараёнида бизга қиличбозлик спорт турининг ўзига хос сирлари ва махсус усулларини ўргатишмоқда.

Қиличбозликни нима учун яхши кўрасиз?

− Чунки мен учун бу энг жозибали ва қизиқарли спорт тури бўлиб,  қиличбозликда асосан диққатни жамлаш ва эпчилик, аниқлик ва тезлик билан ғалабага эришиш муҳим дея таъкидлайди устозларимиз.

–  Карантин даврида ўтказилган онлайн машғулотлар ва биринчи онлайн мусобақа хақида гапириб берсангиз.

– Барча спортчилар қаторида биз ҳам пандемия сабабли карантин даврида ўз уйимизда мустақил ҳамда онлайн тарзда шуғулланишимизга тўғри келди. Албатта, мураббийларимиз томонидан олиб борилган масофавий онлайн машғулотлар мен учун жуда қизиқарли кечди.

Биринчи Республика онлайн кубоги мусобақасида эса бизнинг техник тайёргарлик кўрсаткичларимиз синовдан ўтказилганда мен хали бу борада яна ҳам кўпроқ ишлаш ва машқ қилишим кераклигини билиб олдим. Ҳозир айнан қиличбозликнинг тактик ва техник усулларини ўзлаштиришга жиддий ёндашмоқдаман.

− Шу кунгача спортда эришган ютуқларингиз учун кимга рахмат айтмоқчисиз?

– Албатта, менга энг кўп меҳнати синган мураббийим Вахобжон Мурдасов, мени қўллаб-қувватлаб келаётган ота-онамдан чексиз миннатдорман.

Шунингдек, биз каби ёш спортчилар учун яратилган барча яхши ва қулай шароитлар учун, аввало Юртбошимиз, ЎзР Жисмоний тарбия ва спорт вазирлиги, Қиличбозлик федерацияси ҳамда барча мураббийларимиз ва спорт шифокорлари, ошпазларга ҳам катта рахмат айтаман.

 Суҳбатни Муборак Якубова олиб борди.