15 январь соат 10 да Республика гимнастика бўйича болалар-ўсмирлар спорт мактаби мажмуасида Марказий Осиё қиличбозлик конфедерациясининг кадетлар ва ўсмирлар ўртасида Биринчи очиқ чемпионатининг тантанали очилиш маросими бўлиб ўтди. 

Чемпионатнинг тантанали очилиш маросими олдидан  фаҳрий меҳмонлар, мусобақалар иштирокчилари ва Республика гимнастика бўйича болалар-ўсмирлар спорт мактаби мажмуаси трибунасини тўлдирган қиличбозлик спортининг кўп сонли ишқибозлари учун Ўзбекистон санъат усталарининг концерт дастури тақдим этилди. “Тасанно” раққосалар гуруҳи Марказий Осиё қиличбозлик конфедерацияси аъзолари - Афғонистон, Қозоғистон, Қирғизистон, Тожикистон, Туркманистон, Ўзбекистон халқларининг миллий рақслари билан ҳаммани хушнуд этди.

Чемпионатнинг тантанали очилиш маросимида сўзга чиққан Ўзбекистон Республикаси Жисмоний тарбия ва спорт вазирининг ўринбосари О.О.Қосимов, Миллий олимпия қўмитасининг Бош котиби Ж.М.Матчонов Ўзбекистон Республикаси Президенти Шавкат Мирзиёевнинг  жамиятда соғлом турмуш тарзини қарор топтириш, жисмоний тарбия ва спортни янада оммалаштиришга катта эътибор бераётганлигини алоҳида таъкидладилар. Давлатимиз раҳбари жисмоний тарбия ва спорт соҳасида аҳолининг кенг қатламларини спорт билан шуғулланишга ва соғлом турмуш тарзини юритишга жалб этиш, жисмонан соғлом ўсиб келаётган авлодни тарбиялаш, спорт индустрияси ва инфратузилмасини ривожлантириш, олий спорт маҳорати соҳасида мамлакатимизнинг халқаро спорт майдонида муносиб иштирокини таъминлаш зарурлигини кўрсатмоқда.

Халқаро қиличбозлик федерациясининг минтақамизда Марказий Осиё қиличбозлик конфедерациясини ташкил этиш ташаббуси давлатимиз  томонидан қўллаб-қувватланди. 2019 йил 25 августда Ўзбекистон Республикаси Адлия вазирлиги томонидан Марказий Осиё қиличбозлик конфедерацияси давлат рўйхатидан ўтказилди. Марказий Осиё қиличбозлик конфедерациясининг кадетлар ва ўсмирлар ўртасида Биринчи очиқ чемпионати ҳам Тошкентда ўтказилмоқда.

Марказий Осиё қиличбозлик конфедерациясининг раиси, Ўзбекистон  қиличбозлик федерациясининг раиси Р.М.Шоабдураҳмонов фаҳрий меҳмонлар, мусобақалар иштирокчилари ва спорт ишқибозларини бу катта спорт байрами билан қутлади.

У бугун ҳаммамиз учун унутилмас воқеа эканлиги  - Марказий Осиё қиличбозлик конфедерациясининг кадетлар ва ўсмирлар ўртасида Биринчи очиқ чемпионати ўтказилаётганлигини уқтирди.

Миллий қиличбозлик федерацияларимиз Президентимиз Шавкат Мирзиёевнинг таърифи билан айтганда дўстлик ва биродарлкни янада мустаҳкамлаш, қон-қардош халқлар ўртасидаги ҳамкорликни ривожлантириш учун “умумий Марказий Осиё уйи”мизга бирлашдик.

Биринчи Чемпионатимиз ҳам кадетлар ва ўсмирлар ўртасида ўтказилаётганлиги ниҳоятда диққатга сазовордир. Чунки бевосита улар Осиё ва жаҳон биринчиликлари, Олимпия ўйинлари чўққиларини забт этиш,   машҳур чемпион қиличбозларимизнинг шонли анъаналини муносиб давом эттиришга даъват қилинганлар.

Шунинг учун биз бениҳоя мамнуният билан  Ўзбекистон пойтахти барча меҳмонларимизга “Хуш келибсиз!” деймиз.

Марказий Осиё қиличбозлик конфедерациясининг раиси, Ўзбекистон  қиличбозлик федерациясининг раиси Р.М.Шоабдураҳмонов Марказий Осиё қиличбозлик конфедерациясининг кадетлар ва ўсмирлар ўртасида Биринчи очиқ чемпионатини очиқ деб эълон қилди.

Ўзбекистон Республикасининг давлат мадҳияси янгради.

Чемпионатнинг биринчи кунида кадетлар ва ўсмирлар ўртасида шпага ва сабля бўйича шахсий биринчилиги бошланди.