Бўлажак спорт ташкилотчилари билан учрашув

20 сентябрда Ўзбекистон Республикасининг Президенти Шавкат Мирзиёев жисмоний тарбия ва спорт соҳасини ривожлантириш масалаларига бағишланган кенгашда малакали тренерлар етишмаётганлигини алоҳида таъкидлади  ва шунинг учун уларни тайёрлашни такомиллаштиришни топширди.

Ушбу муаммога Ўзбекистон қиличбозлик федерациясида ҳам дуч келинмоқда. Тренерлар етишмаслиги сабабли минтақаларда қиличбозлик билан шуғулланиш учун имкониятлар мавжудлигига қарамасдан, спортнинг ушбу тури билан шуғулланиш истагида бўлганларнинг ҳаммасини қамраб олишнинг имконияти бўлмаяпти.

Бу  ҳисобга олинган ҳолда Федерация раҳбарияти Жисмоний тарбия университети талабалари билан учрашув ўтказди. Ушбу Университетда бўлиб ўтган тадбирда Ўзбекистон қиличбозлик федерациясининг раиси Р.М.Шоабдураҳмонов спортнинг бўлажак ташкилотчиларини Федерациянинг фаолияти, мамлакатда қиличбозлик спортининг ривожлантирилиши, кейинги йилларда фойдаланишга топширилган янги қиличбозлик заллари, моддий-техника базанинг мустаҳкамланиши, мамлакат терма жамоаси машқларини ўтказиш учун халқаро даражадаги тренерларнинг таклиф этилаётганлги, спортчиларимиз томонидан нуфузли мусобақаларда эришилаётган натижалар тўғрисида батафсил ҳикоя қилиб берди.

Шунингдек, Федерациянинг талабаларнинг Университетда ўқиши учун контракт тўловларини улар олий ўқув юртини тугаллаганларидан кейин республика минтақаларида  камида 3 йил ўз ихтисосликлари бўйича ишлаб беришлари шарти билан қоплашга тайёрлиги маълум қилинди.

Учрашув давомида Университетни тугаллаган қиличбозлик бўйича 10  мутахассис ҳозиргача меҳнат фаолиятини бошламаганлиги маълум бўлди. Ўзбекистон қиличбозлик федерацияси уларга ўз ихтисосликлари бўйича бўш иш жойларини таклиф қилди.