29-30 июль кунлари Сингапурда рапира бўйича кадетлар ўртасида турнир бўлиб ўтди. Мураббий Рустам Ибрагимов бошчилигида Амирхон Алимов ҳамда Ахмадиллахон Солихожиевлар Осиё кадет давраси босқичида қатнашдилар. Спортчиларимиз квалификация босқичидан қийинчиликсиз ўтишди ва 1/32 финалга йўлланма олишди. Ушбу босқичда эса вакилларимиз имкониятни бой бериб қўйишди. Натижада Амирхон 33, Ахмадиллохон эса 35-ўринларни эгаллаб, ўз ҳисобларига 2 рейтинг балини қўшиб қўйдилар.

Ўз вақтида федерация тизимида фаолият олиб борган, бугунги кунда Чирчиқ Олимпия захиралари спорт коллежида ёш спортчиларга қиличбозлик сир-асрорларини ўргатиб келаётган Шерали Носиров билан уюштирилган интервьюни эътиборингизга ҳавола қиламиз. -Шерали ака, интервьюни анъанавий савол билан бошлаймиз. Ўзингиз ҳақингизда гапириб беринг? Неча ёшдан қиличбозлик билан шуғулланишни бошлагансиз? Қизиқишга нима сабаб бўлган? -Қиличбозлик билан шуғулланишни 8 ёшда бошлаганман. Болалигимда отам менга баҳодирлар, рицарлар ҳақида эртаклар айтиб берардилар. Ушбу эртакларда улар қиличда душманга қарши курашардилар. Шундан сўнг қилич ушлаган одам мен учун идеал образга айланган. Мактабда иккинчи синфда ўқиётганимда синфимизга қиличбозлик бўйича мураббий Борис Сергеевич кириб келгандилар. Шундан сўнг мен қиличбозлик билан шуғулланишни бошлагандим.  Ўз вақтида енгил атлетика ва бокс билан ҳам шуғуллангандим. Лекин, вақт ўтганидан сўнг қиличбозлик менинг спортим эканлигини тушундим. 1998 йилда мен бир неча маротаба Республика миқёсидаги турнирларда ғолибликни қўлга киритдим ва Олимпия захиралари билим юртига (ҳозирги Олимпия захиралари спорт коллежи) ўқишга кирдим. Ундан сўнг, 2007 йилда Жисмоний тарбия институтини тамомладим. Мураббийлик фаолиятимни эса 2004 йилда Республика Олимпия захиралари спорт коллежида бошлаганман. 2015 йилдан бери Чирчиқ Олимпия захиралари спорт коллежида фаолият олиб бормоқдаман. -Ўзбек қиличбозлик мактаби ҳақида нималар гапириб бера оласиз? -Ўзбек қиличбозлик мактаби Собиқ иттифоқ пайтидан бери кучли ҳисобланади. Собиқ иттифоқ мамлакатлари ўртасидаги спартакиадада ҳам кўплаб ютуқлар қўлга киритиларди. (У пайтда ғалаба қозониш жуда қийин эди). Ўзбек мактаби доимо истеъдодларга бой ҳисобланади. - Нуфузли турнирларда совридор бўлган Ўзбекистон қиличбозлик мактаби тарбияланувчилари ҳақида нималар айтиб бера оласиз? - Биринчи навбатда, Собир Рузиев! У 5 карра дунё кубоги совриндори ва Олимпиада кумуш медали соҳиби ҳисобланади. Колаверса, Валерий Захаревич 1992 йилги Олимпиада бронза медали соҳиби ҳисобланади. Бундан ташқари якинда уларнинг сафига кўшилган Олег Соколов Эстонияда бўлиб ўтган Жаҳон кубоги чемпиони бўлди. Шахсан ўзимни шогирдларим ҳақида гапирадиган бўлсам, Джеенбаев Саид ва Хамитов Гайратлар икки карра Осие кумуш медали соҳибига айланганлар. - Ўзбекистонда яқин орада яна қачон ва қандай турнир бўлиб ўтади? - Яқин орада Республика миқёсидаги турнир 23 ёшгача бўлган спортчилар ўртасида Ўзбекистон чемпионати бўлади. Ушбу турнир сентябрь ойида бўлиб ўтади. - Қиличбозларимиз олдида турган навбатдаги халқаро турнир қайси? -Яқин орада саблячи кадетларимиз Япониядаги турнирда қатнашишади. Шпага ва рапирачиларимиз Гонконгда бўлиб ўтадиган мусобақада иштирок этишади. - Сизнинг фикрингизча Ўзбекистонда қайси вилоят қиличбозлари етакчи ҳисобланади? - Таъкидлаб ўтишим лозимки, сўнгги йилларда вилоятларда ҳам қиличбозлик спорт тури яхшигина ўсишга эришди. Авваллари фақат Тошкент ва Андижон вилоятлари етакчи ҳисобланган бўлсалар, бугунги кунда Бухоро, Нукус ва Тошкент вилояти қиличбозлари ҳам ўз сўзларини айтишга муваффақ бўлмоқдалар. - Қиличбозлик спорт турини ривожлантириш борасида айни пайтда қандай ишлар амалга оширилмоқда? - Бугунги кунда қиличбозлик федерацияси томонидан кўп ишлар қилинди. Улар вилоятларга ва мураббийларга спорт инвентарлари ажратиб беришди. Турли ёш тоифаларидаги мусобақалар федерация тақвимидаги турнирлар режасидан ўрин олди. Ушбу турнирлар жаҳон стандартларига тўғри келади. Бу борада албатта яхши томонга ўзгаришлар сезилмоқда.   - Айни пайтда Чирчиқдаги Олимпия захиралари спорт коллежида ёш спортчиларга қиличбозликнинг сир-асрорларидан сабоқ бериб келмоқдасиз. Мураббийлик фаоляти қандай кечмоқда? - Коллежда мураббийлардан фақат мен фаолият олиб бормоқдаман. У ерда яна янги мураббий учун ўрин ташкил қилинса ажойиб бўларди. Чунки, бир кишига барча нарса оғирлик қилади. Умид қиламанки, яқинда барчаси яхши томонга ўзгаради. - Шерали ака, Сизни қиличбозлик соҳасида яхши таҳлилчи сифатида биламиз. Айтингчи, 2018 йилда Аргентинада бўлиб ўтадиган ўсмирлар ўртасидаги Олимпиада иштирок этиш учун йўлланма оладиган шогирдларингиз қаторида кимларни кўрсата оласиз? Умуман, Республикамизда ушбу катта турнирда қатнашиш учун йўлланмани қўлга кирита оладиган номзодлар борми? Уларнинг имкониятлари қандай? - Жуда яхши савол. Лицензия қандай қўлга киритилади? Келинг, шу ҳақида гапириб берсам. Олимпиада ўйинларида 12-16 нафар спортчи иштирок этади. Бу дегани хар бир қурол турида хар бир қитъадан 3-4 нафардан 2001-2003 йилда туғилган спортчилар қатнашади. Бугунги кунда шогирдим Душанбоев Жалолиддин ушбу ўйинларга лицензияни қўлга киритиш учун номзодлардан бири ҳисобланади. У бир неча йилдан бери Осиё Чемпионатларида иштирок этади. Бу йил илк маротаба жаҳон чемпионатида қатнашди. Янги тузилган Осиё кадетлар рейтингига кўра Жалолиддин лицензияли ўринлар учун тўртинчи ўринда қайд этилган. Саблячи қизлардан эса Дайибекова Зайнаб (Қорақалпоғистон) 3-ўринни, Исмоилова Севинч 4-ўринни эгаллаб, Аргентина Олимпиадасига йўлланма берувчи ўринлар учун курашмоқдалар. Кўриб турганингиздек Олимпиада йўлланмасига эга бўлиш учун имкониятлар етарли. Бу албатта таҳлил натижалари. Лекин, барчаси 2018 йилги ўсмирлар ўртасида бўлиб ўтадиган жаҳон чемпионатида ҳал бўлади. Унгача эса биз рақибларимизни ўрганган ҳолда, барча таҳлилларни амалга оширишимиз лозим. Ҳозирги ҳолат сақланиб қоладиган бўлса Олимпиадага камида битта лицензиямиз нақд бўлади. Жалолиддин эса жаҳон чемпионатида рейтингини яхшилаб олса, йўлланмаларимиз сони иккитага етади. - Муваффақиятларимиз нимага боғлиқ? - Муваффақият тайёргарликка, мураббийларнинг услубига боғлиқ. Шунингдек, спортчининг халқаро мусобақадаги тажрибасига ҳам кўп нарса боғлиқ. Асосийси, Олимпиадагача натижаларни ушлаб қолиш ва яхшилаб қолиш керак. Албатта, спортда барча нарса бўлиши мумкин. Биз албатта ватанимиз учун қўлдан келган барча ишни амалга оширишга ҳаракат қиламиз!

Лейпцигда бўлиб ўтаётган жаҳон чемпионатида бугун шпагачиларимиз бугун жамоавий баҳсларда иштирок этишди. Жамоавий баҳсларда терма жамоамиз шарафини Роман Александров, Олег Соколов, Жавоҳирбек Нурматовлар ҳимоя қилдилар. Қиличбозларимиз илк босқичда Голландия терма жамоасига тўқнаш келдилар ва 41:45 ҳисобида имкониятни бой бердилар.

Германиядаги жаҳон чемпионатида шпага баҳсларида иштирок этаётган икки нафар спортчимиз Олег Соколов ва Жавоҳирбек Нурматовлар 1/64 финалда жанг қилишлари ҳақида хабар қилгандик. Афсуски, спортчиларимиз ушбу босқичда мағлубиятга учраб, ўз иштирокларини якунлашга мажбур бўлдилар. Жавоҳирбек Нурматов франциялик Даниэль Ерентга қарши тўқнашувда 11:15 ҳисобида ютқазди. Олег Соколов эса Украина вакили Богдан Никишинга 12:15 ҳисобида имкониятни бой берди.

Германиянинг Лейпциг шаҳрида бўлиб ўтаётган жаҳон чемпионатида икки спортчимиз 1/128 финал босқичида ғалаба қозона олди. Илк босқичдан тўғридан-тўғри ўтган Олег Соколов 1/256 финалда канадалик Хугьес Симардни 15:9 ҳисобида мағлубиятга учратди. 1/128 финалда эса Соколов АҚШ вакили Бенжамин Браттон устидан 15:9 ҳисобида ғалаба қозонди. Олег энди навбатдаги босқичга чиқиш учун украиналик Богдан Никишинга қарши тўқнаш келади. Жавоҳирбек Нурматов эса 1/256 финалда колумбиялик Александр Гонсалес устидан 15:13 ҳисобида устун келди. Кейинги босқичда эса Венесуэла вакили Жесус Лимардо 15:13 ҳисобида таслим этилди. Энди у 1/32 финалга чиқиш учун франциялик Даниэль Ерентга қарши жанг қилади. Роман Александров 1/256 финалда америкалик Ясон Приорни 15:14 ҳисобида мағлуб этганди. Кейинги босқичда эса у 14:15 ҳисобида швециялик Робин Кесга ютқазиб қўйди.

Германиянинг Лейпциг шаҳрида қиличбозлик бўйича жаҳон чемпионати старт олди. Бугун мусобақанинг илк кунида шпага бўйича жанг қиладиган спортчиларимиз ўз иштирокларини бошлашди. Пулька натижаларига кўра шпага баҳсларида қатнашган қиличбозларимиз қуйидаги натижаларни қайд этишди: Жавохир Нурматов - 4 ғалаба, 2 мағлубият Олег Соколов - 4 ғалаба, 2 мағлубият Роман Александров - 3 ғалаба, 2 мағлубият Файзулла Алимов - 1 ғалаба, 4 мағлубият. Вакилларимиздан 3 нафари: Жавоҳир Нурматов, Олег Соколов ва Роман Александровлар пулькадан муваффақиятли ўтишди. Энди улар 1/64 финалга йўл олиш учун жанг қиладилар.

Миллий олимпия қўмитасида Ўзбекистон қиличбозлик федерациясининг навбатдан ташқари ҳисобот-сайлов Конференцияси бўлиб ўтди. Ушбу конференцияда федерация раиси лавозимига хақиқий спорт жонкуяри, кўп йиллар давомида Ўзбекистон Республикаси Макроиқтисодиёт ва статистика вазири, Тошкент шаҳар ҳокими лавозимларида фаолият юритган, ҳозирда Ўзбекистон Республикаси Вазирлар Маҳкамаси ҳузуридаги Ўта муҳим ижтимоий, маданий ва тарихий аҳамиятга молик объектларни қуриш, реконструкция қилиш ва капитал таъмирлаш дирекцияси раиси Рустам Мавзурович Шоабдураҳмонов номзоди илгари сурилди. Делегатлар Рустам Шоабдураҳмонов номзодини бир овоздан маъқуллашди ва уни қилизбозлик федерацияси раиси лавозимига сайлашди. Шунингдек, Ўзбекистон қиличбозлик федерациясининг Бош котиби лавозимига шу пайтга қадар федерация раис ўринбосари лавозимида ишлаб келган Муҳаммад Ҳумоюн Ибрагимов бир овоздан сайланди.   Конференция якунида федерацияга янги сайланган раис Рустам Шоабдураҳмонов сўз олиб, унга билдирилган юксак ишонч учун энг аввало давлатимиз раҳбарларига, шунингдек, Жисмоний тарбия ва спорт давлат қўмитаси ва Миллий олимпия қўмитасига ўз миннатдорчилигини изҳор қилди.  -“Зиммамга қандай масъулиятли вазифа юкланаётганлигини жуда яхши тушуниб турибман. Шуни ишонч билан айта оламанки, Ўзбекистон қиличбозлик федерацияси ишини янги босқичга олиб чиқиш, спортнинг ушбу турини янада ривожлантириш ва оммавийлаштириш йўлида бор имкониятларимни ишга соламан. Ўз навбатида менга билдирилган юксак ишонч учун миннатдорчилик изҳор этаман” – деди Рустам Шоабдураҳмонов.   Таъкидлаш лозимки, олдинда қиличбозлик федерациясини ўта масъулиятли давр кутиб турибди. Турли ёш тоифаларидаги қитъа ва жаҳон чемпионатлари, нуфузли халқаро турнирлар, Осиё ўйинлари каби мусобақалар орқали спортчиларимиз тўрт йилликнинг энг муҳим старти – Токио 2020 Олимпия ўйинларига муносиб тайёргарлик кўришлари лозим. Ўйлаймизки бугун амалга оширилган ўзгаришлар узоқ куттирмай ўз самарасини беради. Шунинг билан Конференция ўз ишини якунланди.

Бухорода бўлиб ўтадиган "Шарқ марвариди" халқаро турнири октябрь ойининг 21-26 санасида ўтказиладиган бўлди. Маълумот учун, Республика очиқ чемпионати мақомидаги турнирда ўтган йили чет мамлакатлардан ҳам спортчилар келиб иштирок этишганди. Бу йил бўлиб ўтадиган мусобақада ҳам ҳорижий спортчилар юртимизга ташриф буюриши режалаштирилган. Ўзбекистон қиличбозлик федерацияси томонидан бу йил ташкил қилинадиган мусобақалар тақвими билан УШБУ САҲИФА орқали танишишингиз мумкин.

Гонконгда қиличбозлик бўйича бўлиб ўтган Осиё чемпионати якунига етди. Турнирда Ўзбекистон терма жамоаси 11 нафар спортчи билан иштирок этди. Вакилларимиз турнирдаги иштирокларини якунлаб Ўзбекистонга қайтиб келишди. Қиличбозларимизнинг қитъа биринчилигида қайд этган натижаларидан Ўзбекистон қиличбозлик федерацияси расмий сайти (fencing.uz) орқали, янгиликлар бўлимида хабардор бўлишингиз мумкин.

Бугун Гонконгда давом этаётган Осиё чемпионатида эркаклар ўртасида шпагада жамоавий баҳслар ташкил қилинди. Олег Соколов, Нодирбек Усмонов, Роман Александров ва Жавоҳирбек Нурматовлардан ташкил топган қиличбозларимиз илк босқичда Қирғизистон терма жамоаси вакилларини 45:39 ҳисобида мағлубиятга учратдилар. 1/4 финалда эса турнирнинг энг кучли терма жамоасига қарши баҳс юритган шпагачиларимиз Жанубий Корея терма жамоасига 33:45 ҳисобида ютқазиб қўйишди. Чорак финалда мағлуб бўлган жамоалар ўртасида 5-8 ўрин учун жанглар ташкил қилинди. Спортчиларимиз илк жангда қозоғистонлик рақибларига 33:45 ҳисобида имкониятни бой бердилар. 7-ўрин учун бўлиб ўтган жангларда эса Хитой Тайпейи шпагачилари 45:32 ҳисобида мағлуб этилди. Шу тариқа, шпагачиларимиз Гонконгдаги Осиё чемпионатида 7-ўринни эгалладилар.